ବର୍ତ୍ତମାନର ଆଧୁନିକ ଜ୍ଞାନକୌଶଳ ଯୁଗରେ ମାନବ ସମାଜ ନିଜର ସମସ୍ତ କାର୍ଯ୍ୟକଳାପ ଡିଜିଟାଲ୍ ଉପରେ ନିର୍ଭରଶୀଳ ହେବାକୁ ଲାଗିଛି। ଏହି ପରିବର୍ତ୍ତନ ସମୟରେ ଦୁଃଖଦ ବିଷୟ ଯେ, ଆଜିର ସମାଜ ନିଜ ମାତୃଭାଷା ଓଡ଼ିଆକୁ ଅଣଦେଖା କରି ଅନ୍ୟ ଭାଷାରେ କଥାବାର୍ତ୍ତା ଓ କାର୍ଯ୍ୟ ସମ୍ପାଦନ କରୁଛି। ଫଳସ୍ୱରୂପ, ଡିଜିଟାଲ୍ କ୍ଷେତ୍ରରେ ଓଡ଼ିଆ ଭାଷା ପଛରେ ପଡ଼ିଯାଇଛି।

ଓଡ଼ିଆ ଭାଷାର ସୁରକ୍ଷା, ପ୍ରଚାର ଓ ପ୍ରସାର ପାଇଁ ଓଡ଼ିଆ ଟାଇପିଂ ପ୍ରଶିକ୍ଷଣ ଏକ ଅତ୍ୟନ୍ତ ଆବଶ୍ୟକ ଓ ସମୟୋପଯୋଗୀ ପଦକ୍ଷେପ। ବର୍ତ୍ତମାନର ଡିଜିଟାଲ୍ ଯୁଗରେ ସରକାରୀ, ବେସରକାରୀ ଓ ଶିକ୍ଷାନୁଷ୍ଠାନ ସମ୍ପର୍କିତ ଅଧିକାଂଶ କାର୍ଯ୍ୟ କମ୍ପ୍ୟୁଟର, ମୋବାଇଲ୍ ଓ ଇଣ୍ଟରନେଟ୍ ମାଧ୍ୟମରେ ସଂପନ୍ନ ହେଉଛି। ଏହି ପରିସ୍ଥିତିରେ ଯଦି ଓଡ଼ିଆ ଭାଷାକୁ ଡିଜିଟାଲ୍ ମାଧ୍ୟମରେ ସକ୍ଷମ ଭାବେ ବ୍ୟବହାର କରାଯାଇନପାରେ, ତେବେ ଏହାର ବ୍ୟବହାର ଧୀରେଧୀରେ କମିଯିବାର ଗୁରୁତର ସମ୍ଭାବନା ରହିଛି।

ଏହି ପ୍ରଶିକ୍ଷଣ ମାଧ୍ୟମରେ ଛାତ୍ରଛାତ୍ରୀ, ସରକାରୀ/ବେସରକାରୀ କର୍ମଚାରୀ, ଯୁବକ-ଯୁବତୀ, ଶିକ୍ଷକ, ଲେଖକ, ମହିଳା/ସ୍ୱୟଂ ସହାୟକ ଗୋଷ୍ଠି ଏବଂ ସାଧାରଣ ଜନତା କମ୍ପ୍ୟୁଟର, ମୋବାଇଲ ଓ ଅନ୍ୟାନ୍ୟ ଡିଜିଟାଲ୍ ଉପକରଣରେ ସହଜ ଭାବେ ଓଡ଼ିଆ ଭାଷାରେ ଲେଖିବା ସହିତ କାର୍ଯ୍ୟ କରିବା ସକ୍ଷମ ହେବେ।

ଏହା ଫଳରେ ସରକାରୀ ପତ୍ରାଚାର, ବିଜ୍ଞାପନ, ଆଦେଶ, ରିପୋର୍ଟ, ଇ-ମେଲ, ୱେବସାଇଟ, ସାମାଜିକ ଗଣମାଧ୍ୟମ ଓ ଅନ୍ୟାନ୍ୟ ଡିଜିଟାଲ୍ ପ୍ଲାଟଫର୍ମରେ ଓଡ଼ିଆ ଭାଷାର ବ୍ୟାପକ ବ୍ୟବହାର ସମ୍ଭବ ହେବ।

ସେହିପରି, ପ୍ରଶିକ୍ଷଣରେ ଓଡ଼ିଆ ଭାଷାକୁ ଡିଜିଟାଲ୍ ଯୁଗ ସହ ସମନ୍ୱୟ କରି ଆଗକୁ ବଢ଼ାଇବାରେ ଏକ ମୂଲ୍ୟବାନ ଓ ଦୃଢ଼ ପଦକ୍ଷେପ। ଓଡ଼ିଆ ଭାଷାର ଗରିମା ଓ ପରିଚୟ ସୁରକ୍ଷିତ ରହିବା ସହ ଆଗାମୀ ପିଢ଼ି ପାଇଁ ଏହାକୁ ଅଧିକ ସୁଦୃଢ଼, ସଜୀବ ଓ ସମୃଦ୍ଧ କରାଯାଇପାରିବ।

କଣ ଶିଖିବେ?

ଏହି ପ୍ରଶିକ୍ଷଣ କାର୍ଯ୍ୟକ୍ରମରେ ଅଂଶଗ୍ରହଣକାରୀମାନଙ୍କୁ ଓଡ଼ିଆ ଭାଷାର ବ୍ୟବହାର ସହ ଡିଜିଟାଲ୍ ଟାଇପିଂର ସମ୍ପୂର୍ଣ୍ଣ ଜ୍ଞାନ ପ୍ରଦାନ କରାଯିବ। ଏହି ପ୍ରଶିକ୍ଷଣରେ ୦୪ଟି ସୋପାନ ରହିଛି ଏବଂ ଏହାକୁ ୨୪ଟି ପାଠରେ ବିଭକ୍ତ କରାଯାଇଛି।

• ଓଡ଼ିଆ ବର୍ଣ୍ଣମାଳାର ଟାଇପିଂ ପଦ୍ଧତି
• ମାତ୍ରା ଓ ଯୁକ୍ତାକ୍ଷରର ବ୍ୟବହାର
• ଦୈନନ୍ଦିନ ବ୍ୟବହୃତ ଶବ୍ଦମାନଙ୍କର ଟାଇପିଂ ଅଭ୍ୟାସ
• ତିଥି ଓ ସଂଖ୍ୟାକୁ ଅକ୍ଷରରେ ଲେଖିବା ପ୍ରଣାଳୀ
• ବାକ୍ୟ ଗଠନ ଓ ବାକ୍ୟ ସଂଯୋଜନା
• ଅନୁଚ୍ଛେଦ ଲେଖନ ଓ ଗଠନ କୌଶଳ
• ଶବ୍ଦ ଓ ଅନୁଚ୍ଛେଦ ସଂଶୋଧନ ପ୍ରକ୍ରିୟା
• ଅନୁରୋଧ ପତ୍ର, ବାର୍ତ୍ତା ଓ ଆବେଦନ ପତ୍ର ଲେଖନ
• ବିଜ୍ଞାପନ, ସୂଚନା ଓ ବୈଠକ ସମ୍ପର୍କିତ ଚିଠି ତିଆରି
• ଚାକିରୀ ଓ ଶିକ୍ଷା ସମ୍ବନ୍ଧୀୟ ଆବେଦନ, ଇ-ମେଲ ଓ ଅନ୍ୟାନ୍ୟ ଡିଜିଟାଲ କାର୍ଯ୍ୟ ସମ୍ପାଦନ

ଏହି ପ୍ରଶିକ୍ଷଣ ମାଧ୍ୟମରେ ଅଂଶଗ୍ରହଣକାରୀମାନେ ଓଡ଼ିଆ ଭାଷାରେ ଦକ୍ଷ ଭାବରେ ଟାଇପିଂ କରିବା ସହ ଦୈନନ୍ଦିନ, ଶିକ୍ଷାତ୍ମକ ଓ ପେଶାଗତ କାର୍ଯ୍ୟ ସହଜରେ ସମ୍ପାଦନ କରିପାରିବେ। ଶେଷରେ ସମସ୍ତ ଅଂଶଗ୍ରହଣକାରୀମାନଙ୍କୁ ଓଡ଼ିଆ ଭର୍ଚୁଆଲ୍ ଏକାଡେମୀ (ଓଭିଏ) ତରଫରୁ ପ୍ରମାଣପତ୍ର ପ୍ରଦାନ କରାଯିବ।